Forsíða

Guðmundur Jónsson

prófessor í sagnfræði
Árnagarði, herbergi 404
Háskóla Íslands
101 Reykjavík

Sími: 525 4208
Netfang: gudmjons hjá hi.is
Viðtalstímar: Mánud. 10-12

Ég er fæddur í Reykjavík árið 1955 og þar ól ég manninn fram á fullorðinsár. Að loknu BA-námi í sagnfræði og þjóðfélagsfræði við Háskóla Íslands 1975-1979 vann ég við menntaskólakennslu og lauk jafnframt cand. mag. prófi í sagnfræði árið 1983. Á árunum 1987-1992 bjó ég í Englandi með fjölskyldu minni þar sem ég lagði stund á doktorsnám í hagsögu við London School of Economics and Political Science og brautskráðist þaðan árið 1992. Titill ritgerðarinnar er The State and the Icelandic Economy, 1870-1930. Að loknu námi vann ég að rannsóknum og útgáfu á sögulegum hagtölum hjá Hagstofu Íslands í nokkur ár og var afraksturinn birtur í bókinni Hagskinna – sögulegar hagtölur um Ísland árið 1997. Ég vann sem stundakennari í Háskóla Íslands og Kennaraháskóla Íslands á árunum 1993 til 1997. Árið 1998 var ég ráðinn sem lektor við Háskóla Íslands og hef verið þar prófessor síðan 2004.

Kennslusvið mitt er almenn Íslandssaga 19. og 20. aldar, einkum félags- og hagsaga. Ég hef einnig kennt námskeið um erlenda félags- og hagsögu, þar á meðal um hagsögu Evrópu og N-Ameríku, hnattvæðingu, þróun neysluþjóðfélagsins og sögu kapítalismans. Ég kenni í skyldunámskeiðunum Íslandssaga eftir 1815 og Sagnaritun og söguspeki auk þess sem ég hef með höndum fræðslu um ritun BA-ritgerða.

Rannsóknir mínar falla flestar undir eftirfarandi fjögur svið:
Hagvöxtur og hagþróun á 19. og 20. öld
Neysluhættir og matarsaga síðari alda
Efnahagssamvinna Íslands og Evrópu eftir 1945
Saga velferðarríkisins