Um mig

Erla Hulda Halldórsdóttir, 13. ágúst 2020

Ég er prófessor í sagnfræði við Sagnfræði- og heimspekideild Háskóla Íslands, með kvenna- og kynjasögu sem sérsvið. Störf mín og rannsóknir um árabil hafa að mestu leyti snúist um sögu kvenna og kyngervis. Árið 2011 varði ég doktorsritgerð í sagnfræði og kom hún út sama ár, Nútímans konur. Menntun kvenna og mótun kyngervis á Íslandi 1850-1903.

Niðurstöður rannsókna minna hafa birst í greinum og bókarköflum á Íslandi og erlendis, sjá nánar í lista yfir útgefið efni. Nokkrar greinar og kafla úr bókum má nálgast á academia.edu. Auk fræðilegs efnis hafa birst fáeinir lausbeislaðir pistlar um sögulegt efni á vefnum, sjá nánar hér.

Síðustu ár hef ég unnið að þremur megin verkefnum:

Í fyrsta lagi að ritun og útgáfu bókarinnar Konur sem kjósa. Aldarsaga, sem er skrifuð í tilefni af hundrað ára kosningaréttarafmæli kvenna á Íslandi 2015. Höfundar eru fjórir en auk mín eru það Kristín Svava Tómasdóttir, Ragnheiður Kristjánsdóttir og Þorgerður H. Þorvaldsdóttir. Þótt bókin sé sjálfstætt verkefni, útgáfan kostuð af Alþingi og verkið gefið út af Sögufélagi, hvílir hún að nokkru leyti á rannsóknum okkar í verkefninu Í kjölfar kosningaréttar. Bókin kom út 24. október 2020. Lesa má nánar um hana hér.

Í öðru lagi er rannsóknarverkefnið Í kjölfar kosningaréttar. Félags- og menningarsöguleg rannsókn á konum sem pólitískum gerendum 1915-2015 (sjá hér, bls. 10). Verkefnið hlaut styrk frá Rannís árið 2017 og áður undirbúningsstyrk frá EDDU-öndvegisneti. Að verkefinu hafa unnið auk mín mín Ragnheiður Kristjánsdóttir prófessor í sagnfræði, Hanna Guðlaug Guðmundsdóttir sagn- og listfræðingur og Þorgerður H. Þorvaldsdóttir kynja- og sagnfræðingur.

Í þriðja lagi vinn ég að því ljúka bókinni Bréf til bróður míns, sem er rannsókn á ævi og bréfaskrifum Sigríðar Pálsdóttur (1809–1871). Bókin verður afrakstur rannsóknarverkefnis, nýdoktorsrannsóknar minnar, sem styrkt var af Rannís 2013-2015. Þar koma saman helstu áhugasvið mín og rannsóknaráherslur síðustu ára, þ.e. kynjasögulegt sjónarhorn, notkun persónulegra heimilda, (sagn)fræðilegar ævisögur, verðugleiki sögulegra viðfangsefna, einkum út frá sjónarhorni kyngervis, og kynjun þjóðarsagna. Kveikja og kjarni rannsóknarinnar eru 250 sendibréf sem Sigríður skrifaði bróður sínum, Páli Pálssyni stúdent og skrifara á Stapa um ævina. Bréfin, sem varðveitt eru í viðamiklu bréfasafni Páls á Handritasafni Landsbókasafns, spanna samtals rúmlega hálfa öld, hið fyrsta skrifað í hennar nafni í desember árið 1817 þegar Sigríður var átta ára gömul en hið síðasta fáeinum vikum áður en hún lést 1871.