Ráðstefnan ICME 13 verður haldin í Hamborg síðustu vikuna í júlí.

Opnaður hefur verið ný vefur Rannsóknarstofu um stærðfræðimenntun. Þar er að finna upplýsingar um ráðstefnur sem eru á döfunni sem og ýmsar hagnýtar upplýsingar um rannsóknarstofuna sem og tengla í rannsóknartímarit og erlendar stofnanir á sviði stærðfræðimenntunar.

Opnaður hefur verið hópur á fésbókinni þar sem stærðfræðikennurum gefst tækifæri til að ræða um stærðfræðinám og kennslu og deila hugmyndum með öðrum kennurum. Hópurinn ber nafnið Stærðfræðikennarinn og var hann stofnaður af Ástu Ólafsdóttur Allir eru velkomnir í hópinn og hægt er að senda mér póst ef einhver vill bætast í hópinn.

Þann 2. mars 2011. var stofnað félag um rannsóknir á stærðfræðimenntun á Íslandi.  Félagið hefur það að markmiði að ýta undir og auka áhuga á rannsóknum á sviði stærðfræðimenntunar á Íslandi og að stuðla að aukinni menntun rannsakenda á þessu sviði. Félagið er opið einstaklingum sem styðja markmið félagsins.

Stjórn félagsins skipa Guðný Helga Gunnarsdóttir, formaður. Meðstjórnendur eru Kristín Bjarnadóttir og Ingólfur Gíslason og varamenn eru þær Þóra Rósa Geirsdóttir og Ólöf Björg Steinþórsdóttir.

Félagið hefur sótt um aðild að NoRME - Norrænum samtökum félaga um stærðfræðimenntun á Norðurlöndum en aðalfundur þess félags verður haldinn föstudaginn 13. maí kl. 16:15 í HÍ v/Stakkahlíð í tengslum við NORME 11

NORMA 11 - Norræn ráðstefna um stærðfræðimenntun verður haldin í Hí við Stakkahlíð dagana 11. - 14. maí 2011.

NORMA 11 er sjötta norræna ráðstefnan um rannsóknir á sviði stærðfræðimenntunar.  Hún er haldin í samstarfi við NORME norræn samtök félaga um rannsóknir á sviði stærðfræðimenntunar. Á ráðstefnunni gefst rannsakendum á sviðinu tækifæri til að kynna rannsóknir sínar með ýmsum hætti. Nánari upplýsingar er að finna á heimasíðu ráðstefnunnar. http://vefsetur.hi.is/norma11/ en frestur frestur til að skrá sig á ráðstefnuna er til 1. apríl. . Kennurum gefst tækifæri til að koma sem gestir á ráðstefnuna í einn dag og kostar það 6000 kr. . Þeir sem íslendingar sem ætla að skrá sig gera það í gegnum  heimasíðuráðstefnunnar og fá upplýsingar um hverngi greiða má ráðstefnugjald með því að senda póst á norma11@hi.is.

Á ráðstefnunni verða haldin um eitt hundarð erindi um rannsóknir á sviði stærðfræðimenntunar á Norðurlöndum og víðar og ljóst er að þátttakendur verða vel á annað hundrað.

Aðalfyrilesarar ráðstefnunnar verða þau  Marit Johnsen-Høines frá Háskólanum í Bergen, Núria Planas, Universitat Autonoma de í Barcelona, Bharath Sriraman, Háskólanum í Montana og Roger Säljö frá Háskólanum í Gautaborg. 

Frestur til að skrá sig sem þátttakanda í ráðstefnunni er til 1. apríl 20100.

Fyrirlestar um rannsóknir á sviði stærðfræðimenntunar

Rannsóknarstofa um stærðfræðimenntun efnir til fyrirlestra um stærðfræðimenntun sem verða haldnir alla miðvikudag í mars og einn miðvikudag í apríl.

Staðsetning: Stofa H 201, Háskóla Íslands, Menntavísindasviði v/ Stakkahlíð

3. mars:  Kristín Bjarnadóttir dósent: Björn Gunnlaugsson og Tölvísi – Upplýsing og einlæg trú í stærðfræðimenntun 19. aldar

Björn Gunnlaugsson (1788–1876) var sá Íslendingur sem mest kvað að í stærðfræðimenntun 19 aldar. Áhrif upplýsingastefnunnar koma fram í bók hans, Tölvísi, m.a. í áherslu hans á hagnýta útreikninga og dæmum úr hefðbundnum búskap. Jafnframt koma fram sterk trúarleg viðhorf til stærðfræðilögmála í bókinni. Fyrirlesturinn mun fjalla um líf Björns, bókina Tölvísi og mikilvægi starfa hans fyrir stærðfræðimenntun 19. aldar.

10. mars: Jónína Vala Kristinsdóttir lektor: Stærðfræðinám og kennsla í skóla fyrir alla

Stærðfræðikennarar bera ábyrgð á því að skapa námsumhverfi þar sem allir nemendur fá tækifæri til að læra á eigin forsendum í samvinnu við aðra. Til að geta skipulagt umhverfi sem hvetur til náms þurfa kennarar að læra að greina það nám sem á sér stað í skólanum.  Í erindinu verður fjallað um hvernig kennarar geta bætt stærðfræðikennslu sína með markvissri ígrundun og samstarfi.

17. mars: Guðný Helga Gunnarsdóttir lektor: Áhrif námsefnis á kennsluhætti og námsumhverfi nemenda

Greint verður frá rannsókn sem gerð var á kennslu í einum 8. bekk vorið 2009.  Fylgst var með 10 kennslustundum og þær teknar upp á myndbönd og var sjónum beint bæði að vinnu kennarans og nemendanna. Einnig voru tekin viðtöl við kennarann um kennsluna og skipulagningu hennar og við nemendur um viðhorf þeirra til stærðfræðinámsins. Greint verður frá helstu niðurstöðum og verður einkum fjallað um áhrif námsefnis á skipulag kennslunnar og þætti sem einkenna námsumhverfi nemenda og viðhorf þeirra til námsins.

24. mars: Freyja Hreinsdóttir dósent: Rannsókn á hugbúnaðarnotkun – Forritið Geogebra

Nú stendur yfir rannsókn á því hvernig best verði staðið að notkun hugbúnaðarins GeoGebra við stærðfræðikennslu í grunn- og framhaldsskólum á Íslandi. Í rannsókninni  felst að kanna skoðanir þriggja lykilhópa á þessu. Lykilhóparnir eru þeir sem vinna að menntun stærðfræðikennara, starfandi stærðfræðikennarar og verðandi stærðfræðikennarar. Í fyrirlestrinum verða niðurstöður úr þessari rannsókn kynntar.

14. apríl: Guðbjörg Pálsdóttir lektor: Að styðja stærðfræðikennara í starfi

Í fyrirlestrinum verður greint frá rannsókn á samskiptum sérfræðings í stærðfræðimenntun við þrjá stærðfræðikennara í grunnskóla. Sjónum verður beint að reynslu kennaranna að því að eiga velviljaðan en jafnframt gagnrýninn viðmælanda, á hvaða sviðum kennarar hafa leitað stuðnings og hvernig sérfræðingurinn hefur brugðist við. Áhersla er lögð á að greina hvaða áhrif kennararnir sjálfir og sérfræðingurinn telja að það hafi haft á starfsþróun kennaranna að geta leitað beint að faglegum stuðningi á Menntavísindasviði.